1. Stranglega bannað að gera dónó

Það er full ástæða til að hafa áhyggjur af umræðunni um siðferðismál á Íslandi upp á síðkastið.

Nýjasta dæmið er hrina umfjöllunar um fyrirhugaða ráðstefnu framleiðenda klámmynda hér á landi. Samtök og einstaklingar veittust að ráðstefnunni, sem þó virðist ekki hafa verið ráðstefna þegar allt kom til alls, heldur skemmtiferð, tækifæri fyrir athafnamenn til að sýna sig og sjá aðra og njóta þess sem Ísland hefur upp á að bjóða.

Af umfjöllun mátti ráða að hópurinn myndi ekki aðhafast neitt ólöglegt hér á landi, og alls ekki komast upp með möguleg lögbrot.

En orðið "klám" var nóg til að espa upp umræðu þar sem fljótlega var sett samasemmerki á milli klámefnis og misnotkunar á konum og börnum, og ráðstefnan á Hótel Sögu orðin rót alls ills.

Fáir þorðu að taka til máls til varnar skoðana- og athafnafrelsi. 

Enginn talaði um hversu eðlilegt og heilbrigt hlutverk klámefni leikur í einkalífi allra kynferðislega og félagslegra heilbrigðra karlmanna, og margra kvenna. Klám var orðið vont og hættulegt, sama hvað.

Og svo var það bændastéttin á endanum, óvæntasti vörður siðgæðisins, sem tók af skarið og meinaði klámframleiðendunum um gistingu. Þegar síðan var á það bent að hótelið sjálft hefði um áraraðir selt klámefni gegn gjaldi lofuðu bændur strax að hætta að sjónvarpa laufléttu ljósbláu hótelkláminu.

 -eins og hótel eru annars rómaðar öndvegisstofnanir siðgæðisins.

Umræða um siðferðismál á Íslandi er farin að einkennast í auknum mæli af ofstæki, oftúlkunum og jafnvel hræsni. Þessu litla bloggi er ætlað að vera andsvar við þessum röddum, og málsvari frjálslyndis og heilbrigðs umburðarlyndis.

Það virðist þegar sumir háværir hópar taka sig til og fara á nornaveiðar, þori enginn að mæla á móti þeim. Sá sem þetta ritar þorir því varla sjálfur, því það er auðvelt að verða fórnarlamb ofsókna í samfélagi jafnsmáu og Íslandi. Þess vegna er þetta blogg skrifað nafnlaust að svo stöddu.

 Að endingu vísanir í tvær greinar Baggalúts sem varpar með háði sínu skemmtilegu ljósi á hræsni klámumræðunnar miklu: hér og hér

Athugasemdir

[Ásthildur Cesil Þórðardóttir, 5.3.2007 kl. 18:37]

Venus vekur upp minningar hjá mér, en ég fór í náttúruminjasafnið í Vín, og vildi auðvitað sjá þessa frægu styttu.  En ég missti nærri því af henni, því hún er svo lítil og í sér húsi inn í safninu.  Flott er hún samt sem áður.