14. Illa menntuð ríkisstjórn

Hnoðri var að grúska á Alþingisvefnum og varð heldur betur gáttaður þegar hann skoðaði æviágrip ráðherra hinnar nýju ríkisstjórnar.

• Fjármálaráðherra er dýralæknir og fisksjúkdómafræðingur, og ekki að sjá að hann sé með meistaragráðu.
• Viðskiptaráðherra er með BA í sögu og heimspeki
• Landbúnaðarráðherra + sjávarútvegsráðherra er með BA í stjórnmálafræði
• Heilbrigðisráðherra er með BA í stjórnmálafræði
• Utanríkisráðherra er með Cand. Mag í sagnfræði (er ekki Cand. Mag. svona skemmri skírn í mastersgráðu?)
• Félagsmálaráðherra er með verslunarskólapróf og mikla reynslu sem flugfreyja
• Samgönguráðherra er með iðnskólapróf og kennarapróf
• Umhverfisráðherra er með BA í stjórnmálafræði

 

Af 12 ráðherrum eru aðeins 4 með ígildi meistaragráðu, eða meira.

• Þorgerður Katrín (menntamál) er með lögfræðipróf
• Björn Bjarnason (dómsmrh) er með lögfræðipróf
• Geir Haarde, þessi elska, er með tvær MA gráður frá virtum bandarískum háskólum. Aðra í hagfræði og hina í alþjóðastjórnmálum.
• Össur Skarphéðins er með hæstu menntagráðuna, doktor í lífeðlisfræði, þó spurning er hversu vel það gagnast í iðnaðarráðuneytinu.

 

Hvernig er það, er gefið frat í gildi menntunar á Alþingi?

Eða er það kannski eftir pólitíkinni á Íslandi að láta fisksjúkdómafræðing sjá um fjármálin og heimspeking sjá um viðskiptin?

 

Blessaðir ráðherrarnir eru eflaust allir með mikla reynslu á bakinu úr nefndum og ráðum, og hafa ágætis vit á málaflokkunum sem þeir hafa verið settir yfir. Hins vegar hlýtur ítarleg og löng menntun í viðkomandi málaflokki að skapa miklu dýpri skilning og betri fótfestu fyrir ákvarðanir en reynsla af pólitísku karpi í sölum Alþingis.

Gerðar eru ríkar menntakröfur til lækna, lögfræðinga og endurskoðenda, enda varðar það mikla hagsmuni að þeir séu starfi sínu vaxnir. Enginn fær í dag stjórnunarstöðu hjá framsæknu fyrirtæki nema hafa amk mastersgráðu. Þetta er fólk sem stóla þarf á að þekki sitt svið til hlítar.

-Er kannski hægt að gera sömu kröfu til þingmanna, eða í það minnsta til ráðherra?

(smávægilegar villur lagfærðar 7. júlí 2007)

Athugasemdir

[Ásthildur Cesil Þórðardóttir, 20.6.2007 kl. 19:25]

Fróðleg samantekt hjá þér.  Vonandi hafa þeir þó betur menntaða aðstoðarmenn, sem eru meira á því sviði sem þeir eiga að hafa vit fyrir okkur um.