17. Lymskulegar felu-auglýsingar og blekkingar Betsson á unglingavef?

Eitthvað varð til þess að mig grunaði strax að maðkur væri í mysunni þegar tenglasíðan B2.is birti 29. maí s.l. hlekk á bloggsíðu undir yfirskriftinni "Íslensk stelpa vann 126 þús á Betsson".

Svo ótalmargt við bloggsíðu "stelpunnar" benti til þess að bloggið væri allt uppspuni, og tæki til að auglýsa á lymskulegan hátt veðmálasíðuna Betsson, sem er að stórum eða öllum hluta í eigu íslenskra aðila.

Í dag birtist svo annar hlekkur, að þessu sinni í ákaflega loðna frétt á "fréttasíðunni'" Panama.is, og yfirskriftin nú að "Íslendingur vinnur 6,2 milljónir á Betsson". -og fyrir "fréttasakir" er látinn fylgja með hlekkur í veðmálasíðu Betsson.

Af þessu tilefni leitaði ég uppi hlekkinn um stelpuna, og viti menn -það hefur ekki bæst við ein færsla í "bloggið" hennar síðan hlekkurinn birtist á B2.is á sínum tíma. -Merkilegt!

 

Mér sýnist full ástæða til að ætla að verið sé að beita sérdeilis lymskulegum brögðum til að auglýsa veðmálastarfsemi gegnum B2.is. Það sem meira er, verið er að beita lygum og falsfréttum til þess að ginna nýja viðskiptavini inn á Betsson síðuna.

Og það sem kannski er verst af öllu: B2.is er unglingasíða og má ætla að stór hluti af notendum síðunnar séu ekki orðnir sjálfráða. Það er því verið að beina þessum slæga auglýsingaáróðri að auðsveipum markhópi sem lagalega má ekki taka þátt í fjárhættuspilum.

 

Ég skora á lesendur hnoðrabloggsins að kíkja á hlekkina tvo, sérstaklega "bloggið" stelpunnar, og segja hvað þeim finnst.

 

Ég freistast kannski til að senda línu á viðkomandi eftirlitsstofnanir, svo málið verði rannsakað betur. Í anda frelsisins er ég alveg galopinn fyrir því að fólk fái að tapa öllum sínum peningum í fjárhættuspilum ef það er nógu vitlaust á annað borð til að láta plata sig út í veðleiki. Fjárhættuspil eru skattur á heimsku, eins og maðurinn sagði.

En ef litli vel-meinandi einræðisherrann í mér fengi að ráða myndi ég vilja að fjárhættuspil legðust af. Því það á sér ekki stað nein framleiðsla eða auðgun andans í slíkri starfsemi -bara eintómt peningaplokk sem nýtir sér fíkn og flónsku þeirra sem minnst mega við því að tapa peningunum. Þannig gjalda fjárhagslegir hagsmunir mínir í sameiginlegri auðlegð þjóðarinnar fyrir það að vitleysingum sé leyft að láta plata sig í veðmál, frekar en að beina fjármunum sínum t.d. í verslun og þjónustu. En hugsjónanna vegna verð ég víst að leyfa frelsi einstaklingsins til að grafa eigin gröf að hafa betur í því tilvikinu.

Hins vegar er mér, í anda hins upplýsta og frjálsa markaðar, þvert um geð þegar fólki eru gefnar rangupplýsingar til að láta blekkjast til viðskipta.

Það sýnist mér allt benda til að Betsson sé að gera gegnum B2.is

-því þori ég að veðja!